ዐይንና ጆሮ የሚያሻው፣ የቅዱሱ ዐይንና ጆሮ (ክፍል ሦስት)

ሰኔ 3 ቀን 2017 ዓ/ም (የሰሜን ወሎ ሀገረ ስብከት ሚዲያ)

የሰሜን ወሎ ሀገረ ስብከት ሊቃነ ጳጳሳት ነገን ዛሬ ለመሥራት የሚያደርጉትን ጥረት፣ የነገዋን ቤተክርስቲያን ታሳቢ ያደረገ ሰው የመፍጠር እቅድና ተግባራዊ እንቅስቃሴን ባለፉት ኹለት ክፍሎች አቅርበናል፡፡ የዛሬውን እነሆ፤

አንጋፋው ሰሜን ወሎ ሀገረ ስብከት እንደ ሌላው ጸጋ ኹሉ በመንፈሳዊ አባቶችም እድለኛ ነው። አንጋፋው ሐዋርያ አረጋዊ ሰይፍ ብፁዕ አቡነ ቄርሎስና ጎልማሳው ሰይፍ ብፁዕ አቡነ ኤርምያስ ሐዋርያዊ ጉዟቸው ኹሉንም የልማት ሥራዎች በየፈርጃቸው ያጣመረ ነው። የጥንታዊቷን ሐዋርያዊቷን ኦርቶዶክስ ተዋሕዶ ቤተክርስቲያን ክብር የማስመለስ፣ ዘመኑን የዋጀ አሠራር የመዘርጋት መንፈሳዊ ቁጭቱና ወኔው ተመሳሳይ ነው። ሃይማኖታዊ አስተምህሮን ከራስ አገዝ ኢኮኖሚ ልማት ጋር ያጋማደ ነው። ይኽም ሌላ ምክንያት የለውም፤ ሁለቱም ብፁዓን አባቶች “ለኩሉ ዘሥጋ ወለኵላ ዘነፍስ።” የሚለውን በቃልም በተግባርም የሚተረጕሙ በመኾናቸው የተገኘ መልካም እድል ነው።
መጽሐፍ “በጎቹ ድምፁን ይሰሙታል፡፡” እንዲል ሕዝበ ክርስቲያኑ የአባቶቹን ድምፅ ይሰማል፡፡ “ምክር ሠናይት ለኩሉ ዘይገብራ፡፡” የሚለውን ቃል ይኖራል፡፡ የአባቶቹን ምክር ሰምቶ ይተገብራል፡፡ በአጠቃላይ አባቶቹን ይከተላል፡፡ ምክንያቱም ይኽ ሀገረ ስብከት ታድሎ ብፁዓን አባቶቹ ሃይማኖታዊ ግዴታቸውን ከማኅበራዊ ኃላፊነት ጋር አጣጥሞ የመወጣት የአባትነት ጸጋ ከተቸራቸው መካከል ናቸውና፡፡

ለአብነት ብፁዕ አቡነ ኤርምያስ ወደ ሀገረ ስብከቱ ተሹመው ከተመደቡበት ማግሥት ብዙም ሳይቆዩ ዓለም ዐቀፍ ችግር የኾነው የኮቪዲ 19 ወረርሽኝ፣ በመቀጠልም በሰላም እጦት ምክንያት የስደት ኑሮ ተጋላጭ ወገኖችና የሰላም እጦቱ የወለዳቸው ዘርፈ ብዙ ችግሮች በአካባቢው መፈጠርና መኖር ብፁዓን አባቶችን በብዙ መልኩ እረፍት ነሥቷል፡፡

ይኽም ኾኖ ብፁዕ አቡነ ኤርምያስ በአንድ ጎን በሰው ሠራሽና በተፈጥሮ ችግር ምክንያት ያሉ ክስተቶችን በሕዝቡ ላይ የሚያደርሱትን አደጋ በመቀነስ ማኅበራዊ ኃላፊነት በመወጣት፤ በሌላ ጎን በብፁዕ አቡነ ቄርሎስ በሀገረ ስብከቱ የተጀመሩ ልማቶችን በመጠንም በዓይነትም አጠናክሮና አስፋፍቶ በማስቀጠል ሐዋርያዊ ጉዞአቸውን ያለ እረፍት ከማስቀጠል አልተገቱም። ቅድስት ቤተክርስቲያኗን ማእከል ያደረገው የብፁዕ አቡነ ቄርሎስ ምኞትና ፍላጎቶች በብፁዕ አቡነ ኤርምያስ በእጅጉ ተጠናክረውና ተስፋፍተው ቀጥለዋል፡፡

ብፁዕ አቡነ ኤርምያስ ወደ ጵጵስና ማዕረግ ከመምጣታቸው በፊት መጋቤ ብሉይ ወሐዲስ አባ ሳሙኤል (ቆሞስ) ተብለው ተማሪና መምህር በነበሩበት ወቅት ልጆቻቸውን በቋሚነት ያስተምሩ ነበር፡፡ ጣእመ ስብከታቸው፣ የቃለ እግዚአብሔር መግቦታቸው፣ አጠቃላይ የመንፈሳዊ ሕይወት እንክብካቤያቸው የንስሐ ልጆቻቸውን ልብ ገዛ፡፡ ልጆቹም የመንፈስ አባታቸው ወደ ሌላ አካባቢ በመዛወር እንዳይርቋቸው ካላቸው ፍላጎት በመነሳት የሚቆዩበትን የተለያየ ዘዴ ፈጥረው አማከሯቸው፡፡ ከመሠረታዊ ፍላጎታቸው መካከል የመኖሪያ ቤት ሊገዙላቸው ማሰባቸውንም ገለጹላቸው፡፡ እሳቸው ግን “ባለትዳሮች ልጅ ወልደው በማሳደግ ለቁም ነገር ያበቃሉ፤ እኔ ደግሞ በምናኔ ሕይወቴ ከእኔ የተሻሉ ቤተክርስቲያንን የሚረከቡ ሊቃውንት የሚወጡበት አንድ ትምህርት ቤት ብሠራ” የሚል ሕልም ስለነበራቸው ኹለንተናቸው ቅድስት ቤተክርስቲያን በመኾኗ ለትውልድ የሚሆን ሥራ እንሥራ በማለት ወደ ቤተክርስቲያኗ ልማት የገቡት ከዛሬ 12 ዓመታት በፊት ነበር፡፡

ሐሳባቸውም ወደ ፕሮጀክት አደገ፤ ልጆቻቸውንም በወንጌል ለልማት አስተሳሰረ፡፡ የገጠሯን ቤተክርስቲያን ማልማት ለከተማዋ አካባቢ ለሚገኙ ቤተመቅደሶች ምንጭ እንደማጎልበት እንደሚቆጠር ተረድተው ነበር። ኾኖም የትኛው አጥቢያ ላይ የሚገኘው ሕዝብና ሰበካ ጉባኤ ሐሳቡን በትክክል ይረዳልኝ ይኾን? የሚለው ጥያቄ ግን ቀላል አልነበረም፡፡ ይኹን እንጂ ገንዘብ ሳይባክን የታለመለት ዓላማ ላይ ለማዋል የሚታመን መዋቅርና ቦታ መቃኘት ተጀመረ፡፡ ቦታ ከማመቻቸት ባሻገር ድጋፍ በማድረግ ኀላፊነቱን የሚወጣ፤ በተፈለገው የአሠራር ሥልት መሠረት ሥሩ ብሎ በጎ ምላሽ የሚሰጥ አጥቢያ ተፈለገ፡፡
በወቅቱ ይኽን በጎ ሐሳብ የሚረዳ አካል ለማግኘት ተግባቦት አንዱና ቀዳሚው በር ነበር፡፡ ሕልማቸው አስፋ ገነተጽጌ ቅዱስ ጊዮርጊስ ቤተክርስቲያን ላይ እውን ኾነ፡፡ በፈቃደ እግዚአብሔር፣ በመንፈስ ልጆቻቸው አስተባባሪነት፣ በብፁዕ አቡነ ቄርሎስ ጸሎትና ቡራኬ እየታገዙ የሰውን የሐሳብ ዳገትና ቁልቁለት በወንጌል ዶዘር እያስተካከሉ ፕሮጀክቱ እውን ኾኖ ወደ ማዕርገ ጵጵስና መጡ።

የፕሮጀክቱ አድማስ፣ ዓላማ፣ ራእይና ግብ፣ ጥንታዊና ባሕላዊ የአብነት ትምህርት ቤት ጎጆዎችን ወደ ሰገነት በመቀየር ብቻ የተገደበ አይደለም፡፡ ደቀመዛሙርቱ መሠረታዊ ፍላጎታቸውን ለማሟላት የሚያባክኑት ጊዜ ለንባብና ለበለጠ መራቀቅ እንዲያውሉት ማድረግን ታሳቢ ያደረገ’ንጅ፡፡ ብፁዕነታቸው ከሩቅ አሳቢ ልጆቻቸው ጋር ደቀመዛሙርቱን ተክተው እየለመኑ፣ በሔዱበት ኹሉ ለልጆቼ ብለው አስተባብረው ለክብራቸው ሳይጨነቁ አልባሳት፣ ምግብና መጠለያ እያሟሉ የደቀመዛሙርቱን እንግልት መቀነስን፣ ከእሳቸው የተሻሉ ሰዎችን ለመፍጠርም “ሀ” ብለዋል ጉዟቸውን ተያይዘውታል።

ብፁዕ አቡነ ኤርምያስ ወደ ሊቀ ጵጵስና ማዕረግ ሲመጡ ገና ተማሪና መምህር ኾነው የጀመሩትን የተዋሕዶ ልጆችን የማስተባበርና የሙያ ዐሥራት የመጠቀም ልምድ ፕሮጀክት እየነደፉ ለምእመናን ግልፅ ማድረግ፣ የችግሩን አሳሳቢነት በማሳየት የመፍትሔ ሐሳብ ማመንጨትን አጠናክረው ቀጠሉበት፡፡ የብፁዕነታቸውን ራእይ የተረዱ የቅድስት ቤተክርስቲያኗ የቀጣይ ዘመን እጣፈንታ የገባቸው በጎ አድራጊዎች ትኩረታቸው የደቀመዛሙርት መኖሪያ ፕሮጀክትን ብቻ አይደለም፡፡ የመንፈሳዊ አገልግሎቱ በገንዘብ እጥረት እንዳይስተጓጎል ተቋማቱን በበጀት የሚደጉሙ የገቢ ማስገኛ ፕሮጀክቶችን ጎን በጎን ተግባራዊ ማድረግ ጭምር እንጂ፡፡

በሰው ሠራሽና በተፈጥሮ ችግሮች ምክንያት ከነበረበት ወደ ኋላ ያለውን ሀገረ ስብከቱ መልሶ ለማቋቋምና የአብነት ት/ቤቶችን፣ ልዩ ልዩ መንፈሳዊና ማኅበራዊ አገልግሎቶችን ለመደገፍ የሚያስችል የገቢ ምንጭና ቋሚ ሀብት ለማፍራት የራስ አገዝ ልማትን ለማስፋፋት ቀደም ሲል ከተገነቡት የተለያዩ ሕንጻዎች በተጨማሪ በግዥና በሊዝ በተገኙ የከተማ ቦታዎች ላይ በሀገረ ስብከትና በወረዳዎች የተለያዩ ግንባታዎችና የሕንጻ ግዥዎች እየተከናወኑ ይገኛሉ፡፡

በሀገር ውስጥና በውጭ ሀገራት የሚኖሩ በጎ አድራጊ ወገኖች በለገሡት የገንዘብ፣ የሐሳብ፣ የሙያ፣ የጊዜና የጉልበት ድጋፍ ሀገረ ስብከታችን በደሴ ከተማ ቧንቧ ውሃ አካባቢ ሆቴል ታይምና ስፓ ተገዝቶ ገቢ ማመንጨት የጀመረ ሲኾን ከ60 በላይ ለሚኾኑ ዜጎችም የሥራ እድል ፈጥሯል።

በወልድያ ከተማም አዳጎ አካባቢ 850 ካሬ ላይ ያረፈ G+7 ኹለገብ አገልግሎት መስጫ ሕንጻ በጥራትና በፍጥነት በመገንባት ላይ ሲኾን ለግንባታ ፕሮጀክቱ አገልግሎት የሚሰጡ ተሽከርካሪና ሌሎች ማሽነሪዎችን አሟልቶ ከ760 በላይ ለሚኾኑ ሰዎች ጊዜአያዊ የሥራ እድል ፈጥሮ እየገሰገሰ ነው፡፡
እነዚኽ ኹለት የአገልግሎት መስጫ ሕንጻዎች ቀጣይ ወልድያ ከተማ ላይ ሊገነባ በሒደት ላይ ላለው ባለ5 ኮከብ ሆቴል ግንባታ ፕሮጀክትና ለሌሎች ተያያዥ ልማቶች መልካም እርሾ ይዘዋል፡፡ በራስ አቅም ዘመናዊ ሆቴል ማስተዳደርና በራስ አቅም ግዙፍ ሕንፃ መገንባት መቻሉ የቴክኖሎጂ ሽግግር ልምድን፣ ክህሎትን ማስታጠቅ ጀምሯል።